སྨོན་ལམ་ཚིག་མཛོད་ཆེན་མོ App Store ནང་དུ་དངོས་སུ་འགྲེམ་སྤེལ་བྱས་པ།

བོད་ཡིག་བརྡ་འཕྲིན་ལག་རྩལ་དྲ་བའི་འཕྲིན། སྤྱི་ཟླ་12ཚེས་18ཉིན་སྨོན་ལམ་ཚིག་མཛོད་ཆེན་མོ་དེ་ App Store ནང་དུ་དངོས་སུ་འགྲེམ་སྤེལ་བྱེད་ཐུབ་པ་བྱུང་ཡོད་ལ། iPad/iPhone སོགས་ནང་དུ་རིན་མེད་ཕབ་ལེན་བྱེད་ཆོག་པ་ཞིག་ཡིན། འདི་ནི་སྨོན་ལམ་ཚིག་མཛོད་ཐོན་རིམ་1.1ཅན་དེ་App Store ནང་དུ་འགྲེམས་སྤེལ་བྱས་རྗེས་ཀྱི་མཉེན་ཆས་གསར་པ་དེ་ཡིན།

སྨོན་ལམ་ཚིག་མཛོད་ཆེན་མོ་ནི། སྨོན་ལམ་བོད་ཀྱི་བརྡ་འཕྲིན་ཞིབ་འཇུག་ཁང་གིས་རྩོམ་སྒྲིག་དང་བཟོ་སྐྲུན་བྱེད་བཞིན་པའི་བརྡ་འཕྲིན་བརྒྱུད་ལམ་ཁག་ཏུ་བཀོལ་སྤྱོད་ཡོད་པའི་མཉེན་ཆས་ཅན་གྱི་བོད་ཡིག་ཚིག་མཛོད་ཅིག་ཡིན། བོད་རང་གི་སྔར་ཡོད་ཚིག་མཛོད་ཁག་གི་ལེགས་ཆ་རྒྱུན་འཛིན་ཐོག དེང་དུས་ཀྱི་མི་རིགས་གཞན་གྱི་ཚིག་མཛོད་རིག་པའི་གཞུང་ལུགས་དང་ལག་ལེན་གྱི་ཉམས་མྱོང་བསྡུ་ལེན་བྱས་ཏེ་ཅུང་ཆ་ཚང་ཞིང་ཡང་དག་པའི་ཚིག་མཛོད་ཅིག་ཡིན།

iPad ཁྲོད་ཀྱི་སྨོན་ལམ་ཚིག་མཛོད་ཆེན་མོ།
iPad ཁྲོད་ཀྱི་སྨོན་ལམ་ཚིག་མཛོད་ཆེན་མོ།

བོད་སྐད་ཡིག་སྲུང་སྐྱོབ་དང་དར་སྤེལ་གཏོང་རྒྱུའི་ཐབས་ལམ་གལ་ཆེ་ཤོས་ཤིག་ནི་དེང་རབས་བརྡ་འཕྲིན་བརྒྱུད་ལམ་ལ་བརྟེན་དགོས་པར་མཐོང་སྟེ། འདས་པའི་ལོ་ཤས་རིང་འབད་བརྩོན་ལུ་གུ་བརྒྱུད་དུ་བྱས་འབྲས་ཕྱི་ལོ་ཉིས་སྟོང་ལྔ་ནས་བཟུང་སྨོན་ལམ་བོད་ཡིག་རིམ་པ་དང། སྨོན་ལམ་བོད་ཀྱི་ཐུན་མོང་སྐད་གདངས། སྨོན་ལམ་ཚིག་མཛོད་དང་པོ་དང་༡་༡ སོགས་བོད་སྐད་ཡིག་དང་འབྲེལ་བའི་མཉེན་ཆས་སྣ་ཚོགས་གསར་སྐྲུན་དང་རིན་མེད་འགྲེམ་སྤེལ་བྱས་ཡོད།  མཉེན་ཆས་དེ་དག་གིས་བོད་ཕྱི་ནང་གི་སྤྱི་ཚོགས་ཁྲོད་ཁ་ཡོད་ལག་ཡོད་ཀྱི་ཕན་ཐོགས་བྱུང་བས། གནད་ཡོད་མི་སྣ་དང་། བོད་ཕྱི་ནང་གི་བོད་རིག་པ་མཁས་ཅན། སྐད་ཡིག་སྐོར་གྱི་ཆེད་ལས་ཉམས་ཞིབ་པ་སོགས་མང་པོ་ཞིག་གིས་ལས་དོན་འདི་བཞིན་མུ་མཐུད་རྒྱུན་སྐྱོང་ཡར་རྒྱས་གཏོང་དགོས་ཚུལ་གྱི་དགོངས་འཆར་བྱུང་བ་བཞིན། འདི་ག་ཞིབ་འཇུག་ཁང་གིས་བོད་སྐད་ཡིག་དང་འབྲེལ་བའི་ལས་གཞི་འགའ་ཞིག་ལག་བསྟར་བྱེད་བཞིན་པའི་ཁོངས་ཀྱི་སྨོན་ལམ་ཚིག་མཛོད་ཆེན་མོ་རྩོམ་སྒྲིག་གི་ལས་དོན་གཉེར་བའི་གྲུབ་འབྲས་ཤིག་ཡིན།

iPhone ཁྲོད་ཀྱི་སྨོན་ལམ་ཚིག་མཛོད་ཆེན་མོ།
iPhone ཁྲོད་ཀྱི་སྨོན་ལམ་ཚིག་མཛོད་ཆེན་མོ།

སྨོན་ལམ་ཚིག་མཛོད་ཆེན་མོ་རྩོམ་སྒྲིག་དང་བཟོ་སྐྲུན་གྱི་དགོས་དམིགས།

བོད་མི་རིགས་ལ་ནང་དོན་རིག་པ་གཙོ་བོ་བྱས་པའི་སྲོལ་རྒྱུན་རིག་གནས་ཕུན་སུམ་ཚོགས་པ་ཞིག་ཡོད་ཅིང་། སྐབས་སུ་བབ་པ་ཚིག་མཛོད་ལྟ་བུར་མཚོན་ནའང་། བོད་བཙན་པོའི་རྒྱལ་རབས་སྐབས་སུ་རྩོམ་སྒྲིག་མཛད་པའི་བྱེ་བྲག་རྟོག་བྱེད་ཆེ་འབྲིང་སོགས་བོད་ཡིག་ཚིག་མཛོད་ཀྱི་ཐོག་མ་ཡིན་པའི་དབང་དུ་བཏང་ནའང་། ཡོངས་གྲགས་བོད་ལ་ཚིག་མཛོད་བྱུང་ནས་མི་ལོ་ཆིག་སྟོང་ཉིས་བརྒྱ་བཅུ་སོང་ཟིན་པས་བོད་ནི་འཛམ་གླིང་གི་ནང་ནས་ཚིག་མཛོད་རྩོམ་སྒྲིག་བྱས་པ་སྔ་ཤོས་ཀྱི་གྲས་ཡིན་ངེས། དེ་རྗེས་དུས་རབས་རིམ་པར་ཚིག་མཛོད་ཅེས་མིང་བཏགས་ཡོད་མེད་ལ་མ་ལྟོས་པར་དག་ཡིག་དང་ཚིག་མཛོད་ཧ་ཅང་འབོར་ཆེན་ཞིག་བྱུང་སྟེ་རིག་གནས་འཕེལ་རྒྱས་ཀྱི་དགོས་མཁོ་བསྐངས་ཡོད། ལྷག་པར་དུ་ཉེ་བའི་ལོ་བཅུ་ཕྲག་འགའི་རིང་། བོད་ཕྱི་ནང་གི་གཞུང་དང་དེ་བཞིན་སྒེར་པ་ཤེས་ལྡན་པ་མང་པོས་སྤྱིར་བཏང་དང་ཆེད་ལས་རང་བཞིན་གྱི་ཚིག་མཛོད་མང་པོ་རྩོམ་སྒྲིག་མཛད་གནང་ཡོད་པ་ནི། སྐད་ཡིག་ལས་དོན་ཕྱོགས་ཀྱི་གྲུབ་འབྲས་འགངས་ཆེན་ཡིན་པ་སྨོས་མ་དགོས། འོན་ཀྱང་ད་ཕན་གྱི་བོད་ཡིག་ཚིག་མཛོད་ཁག་ལ་དུས་རབས་དང་ཁོར་ཡུག་སོགས་ཕྱི་ནང་གི་བཀག་རྒྱ་སྣ་ཚོགས་ཀྱི་དབང་གིས། དེང་རབས་ཀྱི་སྔོན་ཐོན་སྐད་ཡིག་གཞན་གྱི་ཚིག་མཛོད་དང་བསྡུར་ན་ཞན་ཆའམ་མི་འདེང་སའི་གནད་དོན་འགའ་ཞིག་གནས་ཡོད་དེ།

མ་ཚིག་གི་གྲངས་འབོར་ཉུང་བ། རིག་གནས་ཁག་གི་ཐ་སྙད་དང་དེ་བཞིན་སྐད་ཡིག་གི་ཐ་སྙད་ཅུང་ཆ་ཚང་བ་ཞིག་བསྡུ་སྒྲིག་དང་འབྲེལ། འགྲེལ་བཤད་གནད་ལ་ཐིངས་པ་ཡོད་པའི་ཚིག་མཛོད་ཅིག་ནི་བོད་སྐད་ཡིག་འཛིན་སྐྱོང་སྤེལ་གསུམ་བྱེད་པར་ཅི་བས་དགོས་མཁོ་ཆེ་བ་སྨོས་མ་དགོས་ཀྱང་། བོད་ཡིག་གི་ཚིག་མཛོད་ཁག་ལ་འགྲེལ་གཞིའི་མ་ཚིག་གི་ཐ་སྙད་འཐུས་ཚང་པོ་མེད་པ་དེ་རེེད། མདོ་དབུས་ཁམས་གསུམ་གྱི་མཁས་པ་གང་མང་གིས་མཉམ་རུབ་བྱས་ཏེ་རྩོམ་སྒྲིག་མཛད་པའི་བོད་རྒྱ་ཚིག་མཛོད་ཆེན་མོར་མཚོན་ན། མ་ཚིག་གི་ཐ་སྙད་ཁྲི་ལྔ་དང་སུམ་སྟོང་ཙམ་ལས་མེད་ཅིང། བསྟན་བཅོས་ཀྱི་ཚིག་དང་། མདོ་དབུས་ཁམས་གསུམ་གྱི་ཁ་སྐད་ཚད་ལྡན་གང་མང་བསྡུ་ཐུབ་མེད་ལ། བར་ལམ་གསར་བྱུང་གི་ཐ་སྙད་ཁག་དེ་བས་ཚུད་མེད་སྟབས། ང་ཚོའི་ཚིག་མཛོད་འདིའི་ནང་མ་ཚིག་འབུམ་གཅིག་དང་བདུན་སྟོང་བརྒྱ་དང་བཅུ་གསུམ་འགྲེལ་བཤད་དང་ཐ་སྙད་རེ་རེའི་འཇུག་དོན་ཁག་ཞིབ་གསལ་བཀོད་ཡོད་ལ། མུ་མཐུད་མ་ཚིག་ཚིག་ཇེ་མང་དང་འགྲེལ་བཤད་ཞིབ་ཚགས་ལ་འབད་བརྩོན་བྱེད་རྒྱུ་ཡིན།

མིང་བརྡའི་འགྲེལ་ཚུལ་ཐད་ཕྱོགས་ལྷུང་གི་གནད་དོན་ཡོད་པ། ཉེ་བའི་ལོ་བཅུ་ཕྲག་ཁ་ཤས་རིང་བོད་ཕྱི་ནང་དུ་ཚིག་མཛོད་རྩོམ་སྒྲིག་དང་པར་སྐྲུན་གྱི་ལས་དོན་གཉེར་ཏེ་རིག་གནས་འཛིན་སྐྱོང་དང་། སྐད་ཡིག་སྦྱོང་སྤྱོད་ཀྱི་ཕྱོགས་ལ་ཕན་ནུས་ལེགས་ཙམ་ཐོན་ཡོད། དེ་དང་ཆབས་ཅིག་གྲགས་ཅན་ཚིག་མཛོད་ཁག་ཅིག་གི་མིང་བརྡའི་འགྲེལ་བཤད་རྒྱག་སྟངས་ཐད་གནད་དོན་ཡོད་པ་རེད། རྒྱུ་མཚན་ནི་ཚིག་མཛོད་དེ་དག་ནང་བོད་ཀྱི་ལོ་རྒྱུས་དང་རིག་གནས་སོགས་མཚོན་པའི་ཐ་སྙད་ཁག་ལ་ཕྱོགས་གཅིག་ཁོ་ནའི་ལྟ་ཚུལ་གྱིས་འགྲེལ་བཤད་བརྒྱབ་ཡོད་སྟབས། བོད་ཀྱི་ལོ་རྒྱུས་དང་ཆོས་ལུགས་རིག་གནས་སོགས་ཀྱི་བརྡ་ཆད་ཁ་མི་ཚང་བ་ཙམ་མ་ཟད། གཞུང་དོན་དང་མི་མཐུན་པའི་འགྲེལ་ལོག་བརྒྱབ་པ་ནི་ཅུང་ཚབས་ཆེན་ཡིན་པ་དེ་རེེད།

ཚིག་མཛོད་ཚད་ལྡན་སྒྲིག་སྟངས་ཀྱི་ཁྱད་ཆོས་མི་ལྡན་པ། འདས་པའི་མི་ལོ་ལྔ་བཅུ་ལྷག་རིང་བོད་ཕྱི་ནང་དུ་སྐད་གཅིག་ཅན་དང་། སྐད་གཉིས་ཅན། སྐད་མང་ཤན་སྦྱར་བཅས་ཀྱི་ཚིག་མཛོད་རིགས་དུ་མ་ཞིག་ཐོན་ཡོད་ཀྱང་། བོད་ཡིག་རྐྱང་པའི་ཚིག་མཛོད་ལ་མཚོན་ན། དེང་རབས་ཀྱི་སྔོན་ཐོན་རང་བཞིན་གྱི་ཚད་ལྡན་ཚིག་མཛོད་ཀྱི་ཁྱད་ཆོས་གང་འཚམ་ཡོད་པ་ནི་ཧ་ལམ་དག་ཡིག་གསར་བསྒྲིགས་གཅིག་པུ་དེ་རེད། འོན་ཀྱང་ OED (Oxford English Dictionary) སོགས་རྒྱལ་སྤྱིའི་ཚིག་མཛོད་གྲགས་ཅན་ཁག་དང་བསྡུར་ན། ད་དུང་ནར་མ་སོན་པའི་བྱིས་པ་ལྟ་བུ་ཞིག་གི་ཚད་ན་གནས་ཡོད་སྟབས། འདིར་རྒྱལ་སྤྱིའི་ཚད་ལྡན་གྱི་ཚིག་མཛོད་ཁག་གི་ཁྱད་ཆོས་བོད་རང་ལ་དགོས་མཁོ་ཡོད་རིགས། སྙིགས་དོར་བཅུད་ལེན་བྱས་ཏེ་གོམ་སྟབས་གསར་བ་ཞིག་སྤོས་ཡོད།

མཉེན་ཆས་ཅན་གྱི་ཚིག་མཛོད་འགོ་འབུས་ཙམ་ཡིན་པ། བོད་ཡིག་གི་མཉེན་ཆས་ཅན་གྱི་ཚིག་མཛོད་སྔ་ཤོས་དང་ལེགས་ཤོས་ནི་སྨོན་ལམ་ཚིག་མཛོད་ཙམ་ཡིན་ལ། མཉེན་ཆས་ཅན་གྱི་སྨོན་ལམ་བོད་ཡིག་ཚིག་མཛོད་དང་པོ་དེ་ནི་སྤྱིར་བཏང་གི་སློབ་གཉེར་དང་རིག་གནས་བྱ་བ་སྒྲུབ་མཁན་ཞིག་གི་དགོས་མཁོ་སྐོང་ཐུབ་ཙམ་ལས། གཞི་རྒྱ་ཆེ་བའི་སློབ་གཉེར་དང་ཆེད་ལས་ཞིབ་འཇུག་གི་དགོས་མཁོ་སྐོང་མི་ཐུབ། དེས་ན་འདི་ག་ཞིབ་འཇུག་ཁང་གིས་གནད་དོན་དེ་དག་ཐག་གཅོད་གང་ལེགས་ཡོང་བ་དང་། དེང་དུས་ཀྱི་སྔོན་ཐོན་རང་བཞིན་གྱི་བོད་ཡིག་ཚིག་མཛོད་ཅིག་རྩོམ་སྒྲིག་བྱ་ཆེད་ཚིག་མཛོད་ཀྱི་སྒྲོམ་གཞི་གཏན་འབེབས་དང་། དེའི་ཐོག་བོད་ཕྱི་ནང་གི་འབྲེལ་ཡོད་མཁས་དབང་དང་ཆེད་ལས་པ་མང་པོའི་དགོངས་ཚུལ་བསྡུ་ལེན་གང་ནུས་ཞུས་ཡོད།

བོད་ཀྱི་རིག་གནས་དང་ལོ་རྒྱུས་སོགས་ཀྱི་ཐ་སྙད་སྤྱི་དང་། སྒོས་སུ་ནང་དོན་རིག་པའི་གསུང་རབ་ཀྱི་བརྡ་ཆད་ཁག་ཅུང་ཆ་ཚང་བ་ཞིག་བསྡུ་སྒྲིག་བྱས་ཡོད་ལ་ད་དུང་མུ་མཐུད་ཁ་སྐོང་བྱ་རྒྱུ། ཚིག་གམ་ཐ་སྙད་ཁག་གི་འཇུག་དོན་འགྲེལ་བཤད་རྒྱག་སྟངས་ཐད་རིག་ཚན་སོ་སོའི་སྐབས་ཐོབ་ཀྱི་གོ་དོན་གང་ཡིན་དོན་དང་མཐུན་པའི་འགྲེལ་བཤད་ཡོང་ཐབས་ཞུས་ཡོད།

བོད་རང་གི་སྔར་ཡོད་ཚིག་མཛོད་ཁག་གི་ལེགས་ཆ་རྒྱུན་འཛིན་དང་། དེའི་ཐོག་དེང་རབས་རྒྱལ་སྤྱིའི་རིམ་པའི་ཚིག་མཛོད་ཚད་ལྡན་ཁག་གི་སྒྲིག་སྟངས་ལས་ལེགས་ཆ་བླངས་ཏེ། རྒྱལ་སྤྱིའི་ཚིག་མཛོད་ཀྱི་ཚད་ལོངས་པའི་བོད་ཡིག་ཚིག་མཛོད་ཅིག་སྒྲིག་བཟོ་བྱ་རྒྱུར་འབད་བརྩོན་བསྟེན་ཡོད། བོད་དང་ཧི་མ་ལ་ཡའི་མི་རིགས་ཁག་སོགས་སྐད་ཡིག་རིག་གནས་གཅིག་གྱུར་ཡིན་པའི་སློབ་གཉེར་པ་དང་། ཞིབ་འཇུག་པ། དེ་བཞིན་ཤེས་ཡོན་གྱི་ལས་ཀ་སྒྲུབ་མཁན་ཚོར་ཕན་ཐོགས་དང་། བོད་རིག་པར་ཞིབ་འཇུག་དང་སློབ་གཉེར་གནང་མཁན་གྱི་ཕྱི་རྒྱལ་མཁས་པ་དང། སློབ་ཕྲུག་སོགས་ལ་བོད་ཀྱི་རིག་གནས་ལ་དོ་སྣང་སྔར་ལྷག་ཡོང་བའི་རེ་བ་བཅངས་ཡོད།

ཕབ་ལེན་བྱེད་སྟངས།

App Store ནང་དུ་ཐད་ཀར་ Monlam Grand Tibetan Dictionary 1 ཅེས་བཙལ་ན་རྙེད་ཐུབ་ལ། སྦྲེལ་ཐག་ནི་འདིར་བསྣུན

“སྨོན་ལམ་ཚིག་མཛོད་ཆེན་མོ App Store ནང་དུ་དངོས་སུ་འགྲེམ་སྤེལ་བྱས་པ།” དཔྱད་མཆན 1 ཡོད།

དཔྱད་མཆན་སྤེལ།

ཡིག་ཟམ་ས་གནས་ཀུན་པོར་མི་བསྒྲགས། རྟགས * ཅན་ངེས་པར་དུ་བླུགས་དགོས།