Li-Fi ཚོད་ལྟ་བྱས་པ་དང་དེའི་མྱུར་ཚད་ནི་ Wi-Fi ལས་ལྡབ་བརྒྱ་ལྷག་ཙམ་གྱིས་མྱུར་བ་ཡོད།

བོད་ཡིག་བརྡ་འཕྲིན་ལག་རྩལ་དྲ་བའི་འཕྲིན་གཏོང་བ་བསོད་ནམས་ཟླ་བ། གཅིག་བྱས་ན་ཁྱེད་ཀྱིས་ཉེ་དུས་བརྡ་འཕྲིན་ལག་རྩལ་དང་འབྲེལ་བའི་གནས་ཚུལ་ཁག་གི་ནང་ Li-Fi ཟེར་བའི་དྲ་རྒྱའི་མཐུན་རྐྱེན་གསར་པ་ཞིག་བཟོས་ཡོད་པའི་སྐོར་གནས་ཚུལ་གོ་ཐོས་བྱུང་ཡོད་ཤས། ཚན་རིག་པས་བརྟག་དཔྱད་ཁང་དུ་ཚོད་ལྟ་བྱས་མཐར་བརྡ་འཕྲིན་ལག་རྩལ་གསར་པ་འདི་ནི་ད་ཡོད་ཀྱི་དྲ་རྒྱའི་མཐུན་རྐྱེན་ Wi-Fi ལས་ལྡབ་བརྒྱ་ལྷག་གིས་མྱུར་བ་དང་མྱུར་ཚད་ 224 gbps བར་སླེབས་ཀྱི་ཡོད་པར་གྲགས་ཡོད།

Li-Fi
Li-Fi

ད་ཆ་ཚན་རིག་པས་ Li-Fi དེ་བརྟག་དཔྱད་ཁང་ནས་ཕྱིར་བཏོན་ཏེ། ཨི་སི་ཊོ་ནྱའི་རྒྱལ་ས་ཊོ་ལཱི་ཎ་ (Tallinn in Estonia) ཡི་ལས་ཁུངས་དང་ལས་གྲྭ་ཁག་གི་ནང་བེད་སྤྱོད་གཏོང་འགོ་བཙུགས་ནས་དྲ་རྒྱའི་མྱུར་ཚད་ 1GB ཅན་གྱི་ཡིག་ཆ་ཞིག་སྐར་ཆ་གཅིག་ནང་ཕབ་ལེན་བྱས་ཐུབ་ཀྱི་ཡོད། གོ་བདེ་བར་བཤད་ན་ཆུ་ཚོད་གཅིག་དང་ཕྱེད་ཀའི་ཧོ་ལི་ཝུཊ་གློག་བརྙན་ཞིག་སྐར་ཆ་གཉིས་ཀྱི་ནང་ཚུད་དྲ་ཐོག་ནས་ལེན་ཐུབ་པ་ནང་ལྟར་རེད། དེ་ནི་བསམ་ཡུལ་ལས་འདས་པའི་མྱུར་ཚད་ཞིག་རེད་ལ་དེ་སྔ་ཕན་ཆད་བྱུང་མེད།

ཨི་སི་ཊོ་ནྱའི་བརྡ་འཕྲིན་ལག་རྩལ་ཁང་གི་འགན་འཛིན་སྐུ་ཞབས་དྷི་པཀ་སོ་ལང་ཀི་ (Deepak Solanki) ལ་ IBTimes UK གསར་ཁང་གིས་བཅར་འདྲི་བྱས་པའི་ནང་བརྗོད་གསལ། “ང་ཚོས་ད་ལྟ་ཚོང་སྡེ་དང་ལས་གྲྭ །སློབ་གྲྭ །ལས་ཁུངས། དབྱིངས་ཡོད་མཁན་གྱི་ཁྱིམ་ཚང་མང་པོ་ཞིག་དང་མཉམ་དུ་ Li-Fi སྒྲིག་བཅུག་གི་སྔོན་འགྲོ་ལས་འཆར་མང་པོ་ཞིག་འགྲོ་བཞིན་ཡོད།” ཟེར་བརྗོད་ཡོད།

Li-Fi ནི་སྐུ་ཞབས་ཧཱ་རལ་ཧའས་ (Harald Haas) གིས་གསར་གཏོད་གནང་བ་ཞིག་དང་། སི་ཀོཊ་ལེནཌ་ (Scotland) ནང་ཡོད་པའི་ཨི་ཌིན་བྷརག་གཙུག་ལག་ཁང་དུ་ (University of Edinburgh) ངོ་སྤྲོད་ལག་བསྟར་བྱས་ཡོད། དེ་དུས་ཁོང་གིས་ LED གློག་ཞུན་ཆུང་ཆུང་དེ་འདྲ་སྤྱད་དེ་གློག་ཞུན་གྱི་འོད་མདངས་འགྱུར་གྲོས་ལ་རྟེན་ཏེ་བརྡ་འཕྲིན་ནམ་ཡིག་ཆ་གཏོང་ལེན་བྱས་ཡོད། སྐབས་དེ་དུས་ནས་འོད་མདངས་སྤྱད་དེ་བརྡ་འཕྲིན་གཏོང་ལེན་བྱེད་སྟངས་འདི་རླུང་འཕྲིན་ལས་མྱུར་བ་དང་། རྒྱུ་ལམ་མམ་ཐགས་ཞེང་ (bandwidth, 带宽) ཆེ་བ་ཡོད་པ་རྟོགས་ཡོད།

Li-Fi ནི་འོད་ཚད་ Terahertz (THz) 400 ནས་ 800 ནང་བརྡ་ལེན་གཏོང་རེས་ཐུབ་ཀྱི་ཡོད། འོད་སྤྱད་དེ་འབྲེལ་མཐུད་བྱེད་སྟངས་དེ་ལ་དབྱིན་ཡིག་ཐོག་ VLC ( Visible Light Communication ) ཟེར། ལག་རྩལ་དེ་ནི་ཆེས་ཡར་ཐོན་གྱི་ Morse Code གསང་བརྡ་སྤྱད་ཚུལ་ནང་བཞིན་རེད། སྐར་ཆ་གཅིག་གི་ནང་ང་ཚོའི་མིག་གིས་འཛིན་མི་ཐུབ་པའི་འོད་འཁྱུག་འཁྱུག་སྟོང་ཕྲག་འགའ་བྱེད་ཐུབ་པ་དང་འོད་འཁྱུག་སྟངས་ཀྱི་རྣམ་པ་དེ་དག་གཉིས་སྤར་རྩིས་གྲངས་(binary system) ཐོག་གནས་ཚུལ་རྣམས་སྒྱུར་གཏོང་བྱེད་ཐུབ་ཀྱི་ཡོད།

ངས་འདིར་འོད་འཁྱུག་འཁྱུག་བྱེད་ཀྱི་རེད་ཟེར་བའི་སྐབས་སེམས་ཁྲལ་བྱ་མི་དགོས། གློག་འོད་རྣམས་ནི་ LED སྤྱད་ཀྱི་ཡོད་པ་དང། དེ་དག་གིས་འཁྱུག་འཁྱུག་བྱས་པར་ང་ཚོའི་མིག་གིས་འཛིན་མི་ཐུབ།

Li-Fi དཔེ་མཚོན་རི་མོ།
Li-Fi དཔེ་མཚོན་རི་མོ།

Li-Fi ཅན་གྱི་ཁོར་ཡུག་དང་ཤེས་དགོས་པ་འགའ།

Li-Fi འདི་ Wi-Fi ལས་མྱུར་བ་ཡོད་པའི་སྟེང་ད་དུང་ཁྱད་ཆོས་གཞན་དག་ནི། འོད་རྩིག་གྱང་བཅད་དེ་འགྲོ་མི་ཐུབ་པ་དེ་ཡིན། དེར་བརྟེན་ཁང་པའི་ནང་ངོས་སུ་དྲ་རྒྱའི་མཐུན་རྐྱེན་ཆ་ཚང་ལྡན་ཡང་ཕྱི་ཕྱོགས་སུ་འགག་ནས་དྲ་རྒྱའི་བདེ་འཇག་ལ་སྒེར་སྲུང་བྱུང་བ་རེད། གཉིས་ནས་འོད་ཀྱིས་ད་ཡོད་ཀྱི་རླུང་འཕྲིན་རྒྱུ་ལམ་ (ཐགས་ཞེང་) ལ་འགོག་རྐྱེན་རྩ་བ་ནས་སླེབས་ཀྱི་མེད་པ་རེད།

བརྙན་ཟློས་ལ་ཐད་ཀར་གཟིགས་མ་ཐུབ་ན་འདིར་བསྣུན་རོགས།
http://www.ted.com/talks/harald_haas_a_breakthrough_new_kind_of_wireless_internet

ད་ལྟ་དང་མ་འོངས་གང་དུའང་ Li-Fi སླེབས་པའི་རྐྱེན་གྱིས་ Wi-Fi མེད་པ་ཆགས་འགྲོ་བ་དེ་འདྲ་མི་སྲིད་ཀྱང་། Li-Fi གྱི་བརྡ་འཕྲིན་ལག་རྩལ་གསར་པ་དེ་ Wi-Fi དང་དཔུང་པ་མཉམ་གཤིབ་དང་སྤྱོད་སྒོ་རྒྱ་ཆེ། དགོས་མཁོ་འདྲ་མིན་ལ་གཞིག་པའི་བེད་སྤྱོད་གཏོང་རྒྱུ་ཡོང་བ་ཆགས་ཐུབ།

Li-Fi ནི་ལག་རྩལ་གསར་པ་དང། ཕྱི་ནང་རྒྱལ་ཁབ་མང་པོའི་ནང་ཁྱབ་ཐུབ་པ་དང་ལག་བསྟར་ཐུབ་པའི་གདེང་ཚོད་བྱུང་བར་བརྟེན། སྐུ་ཞབས་ཧཱ་རལ་ཧའས་ (Harald Haas) དང་ཁོང་གི་མཉམ་ལས་རུ་ཁག་གིས་ PureLiFi ཟེར་བའི་ཀམ་པ་ཎི་གསར་བཙུགས་བྱས་པ་རེད། ད་ལྟའི་ཆར་ཁོང་ཚོས་ Li-Fi འཕྲུལ་ཆས་སྟབས་བདེ་འགའ་ཤས་བཟོས་ཏེ་འགྲེམས་ཚོང་དང་ཚོགས་སྡེ་ཁག་གི་ནང་སྒྲིག་བཙུགས་ཀྱང་བྱེད་རོགས་བྱེད་ཀྱི་ཡོད་འདུག །ད་ལྟའི་ Li-Fi ཐོན་རིམ་དང་པོ་དེ་དག་གིས་དྲ་རྒྱའི་མྱུར་ཚད་ནི་སྐར་ཆ་གཅིག་ནང་ 11.5 MB ཅན་གྱི་ཡིག་ཆ་གཏོང་རེས་དང་ཕབ་ལེན་བྱས་ཐུབ་ཀྱི་ཡོད། ཕྱོགས་གཞན་ཞིག་ནས་བཤད་ན་ད་ཡོད་ཀྱི་ Wi-Fi སྤུད་ཚད་མཐོ་ཤོས་དང་འདྲ་པོ་རེད། ཧྥ་རན་སིའི་འཕྲུལ་ཆས་བཟོ་གྲྭ་ Oledcomm གྱིས་ Li-Fi དེ་བཞིན་སྒེར་མཉེར་སྨན་ཁང་ཆེན་པོ་ཞིག་གི་ནང་སྒྲིག་འཇུག་བྱས་ཡོད།

སྐུ་ཞབས་ཧཱ་རལ་ཧའས་ (Harald Haas) ཀྱིས་ཕྱི་ལོ་ 2011 ལོའི་ TED talk གཏམ་བཤད་ལ་གཟིགས་ན།
“རིང་པོར་མ་ཐོག་པར་ང་ཚོས་ཉིང་ལྷེབ་ཕྲ་མོ་ (microchip 微型芯片) ཞིག་གློག་བཞུ་(ཤེལ་རྡོག) དེ་དག་གི་ནང་བཅུག་ཐུབ། དེ་དུས་གློག་བཞུས་དོན་དག་གཉིས་གྲུབ་ཐུབ། གཅིག་ནས་འོད་སྣང་སྦྱིན་ཐུབ་པ་དང་། གཉིས་ནས་དྲ་རྒྱའི་མཐུན་རྐྱེན་སྦྱོར་ཐུབ། མ་འོངས་དུས་ཚོད་ཅིག་གི་ནང་འོད་ཟེར་ཡོད་ན་དྲ་རྒྱ་ཡོད་ཤག་ཤག་ཆགས་རྒྱུ་ནི་ངའི་རེ་བ་ཡིན།” སྐུ་ཞབས་ཧཱ་རལ་ཧའས་ (Harald Haas)ཀྱིས་དེ་ལྟར་གསུངས།

དཔྱད་མཆན་སྤེལ།

ཡིག་ཟམ་ས་གནས་ཀུན་པོར་མི་བསྒྲགས། རྟགས * ཅན་ངེས་པར་དུ་བླུགས་དགོས།