ཡོངས་འཛིན་བོད་ཡིག་འཚོལ་བཤེར་ཚོད་གཏོང་བྱས་པ།

ཡོངས་འཛིན་བོད་ཡིག་འཚོལ་བཤེར་མ་ལག་སྔོག་འདོན་ལས་གཞི་དུས་སྐབས་གཉིས་པའི་འཛུགས་སྐྲུན་དུ་སླེབས་པ།
ཡོངས་འཛིན་བོད་ཡིག་འཚོལ་བཤེར་མ་ལག

གོ་ལ་ཟླུམ་པོའི་ཆ་འཕྲིན་གྱི་ཆུ་གཏེར་ཆེན་པོའི་ཀླུང་དུ་སྣ་ཚོགས་རིག་གནས་ཀྱི་རྡེབ་ཤུགས་དྲག་ཏུ་འཕྱོ་བའི་དུས་སུ་རང་མི་རིགས་ཀྱི་སྐད་ཡིག་ཡར་རྒྱས་གོང་འཕེལ་དུ་གཏོང་བའི་ཕུགས་ཀྱི་དམིགས་རྟེན་སྙིང་དུ་རུམ་ཞིང་། རང་མི་རིགས་ཀྱི་སྐད་ཡིག་འདི་ཉིད་འཛམ་གླིང་ཕུང་གཅིག་ཅན་ཏུ་འགྱུར་བའི་འགྲོས་དང་མཉམ་པར་བྱེད་པའི་དགོས་པ་ཡོངས་སུ་རྫོགས་པར་དགོངས་ནས། ཡོངས་འཛིན་འཚོལ་བཤེར་གྱི་འདོན་སྤེལ་ལས་གཞི་དེ་བགྲང་བྱ་གསུམ་ལྷག་གི་རིང་ལ་འཆར་བཀོད་དང་ལག་བསྟར་སོགས་ཀྱི་ལས་ཀ་རབ་དང་རིམ་པ་བརྒྱུད་མཐར། འཛམ་བུ་གླིང་གི་ཆ་འཕྲིན་གྱི་སྒང་ལ་གོམ་པ་དང་པོ་སྤོས་པ་སྟེ། 2016ལོའི་ཟླ8པའི་ཚེས2ཉིན་ནས་བཟུང་ཡོངས་འཛིན་བོད་ཡིག་འཚོལ་བཤེར་ཚོད་གཏོང་བྱ་རྒྱུ་ཡིན་ཞིང་། དྲ་གནས་ནིwww.yongzin.comཡིན།

འདས་ཟིན་པའི་ལོ་ངོ་གསུམ་གྱི་རིང་མི་རིགས་ཀྱི་རིག་གནས་འཛིན་སྤེལ་གྱི་འགན་འཁྲི་མ་བསྐུལ་སྒོས་ཕྲག་ཏུ་བླངས་ཤིང་དཀའ་བ་སྟོང་ཕྲག་གདོང་གིས་བསུས་ནས་བོད་ཡིག་འཚོལ་བཤེར་མ་ལག་ཅིག་ཀུན་གྱི་མཐོང་ལམ་དུ་མངོན། ཡིན་ཡང་། ཡོངས་འཛིན་འཚོལ་བཤེར་འདི་ཡང་འཇིག་རྟེན་གྱི་ཆོས་ཀུན་ལས་མ་འདས་པར་མེད་པ་ནས་ཡོད་པ་དང་། དེ་ནས་རིམ་བཞིན་འཚར་ལོངས་འབྱུང་བའི་ཆོས་ཉིད་ཅིག་བརྒྱུད་དགོས་པས། མིག་སྔའི་ཡོངས་འཛིན་འཚོལ་བཤེར་ནི་གསར་དུ་འབུས་པའི་མྱུ་གུ་ཇི་བཞིན་མ་འོངས་པར་འཛམ་གླིང་ཆ་འཕྲིན་གྱི་གཤིན་ས་རུ་རྩ་བ་ཚུགས་ཤིང་འདབ་བརྒྱ་ལྷུག་པོར་གྲོལ་དགོས་ན།ད་རུང་ལོ་ཟླ་འཁོར་འགྲོས་ཀྱི་ཁུགས་དཀྱོགས་གང་མང་མང་ཞིག་བརྒྱུད་དགོས་ལ། བོད་ཀྱི་རིག་གནས་ཀྱི་ཉིང་བཅུད་སྲོག་རྩར་བརྒྱུས་པའི་ཡོངས་འཛིན་འཚོལ་བཤེར་ནི་མི་གཅིག་གམ་ཡང་ན་ཚོགས་པ་གཅིག་ལ་དབང་བ་མ་ཡིན་པར། བོད་ཡིག་སྤྱོད་བཞིན་པའི་དྲ་དམངས་ཡོངས་ཀྱི་ཐུན་མོང་གི་རིག་གནས་ཀྱི་སྟེགས་བུ་ཞིག་ཡིན་གཤིས། ང་ཚོས་རྡོག་རྩ་གཅིག་སྒྲིལ་དང་ཕྱར་བ་གྲུ་འདེགས་སྒོས་ཡོངས་འཛིན་འཚོལ་བཤེར་མདུན་སྐྱོད་ཀྱི་ལམ་ཁ་ཇེ་ཡངས་དང་ཇེ་སྙོམ་དུ་གཏང་དགོས།

གཞན་ཡོངས་འཛིན་འཚོལ་བཤེར་ལ་སྤོ་སྒུལ་སྣེ(APP)དང་དྲ་ངོས་སྣེ(PC)གཉིས་ཡོད་ཅིང་། སྤོ་སྒུལ་སྣེའི་པར་གཞི་དེ་ད་ལྟ་ད་རུང་ཇུས་འགོད་དང་ལེགས་སྒྲིག་བྱེད་བཞིན་པའི་སྒང་ཡིན་པས། རྒྱ་ཆེའི་དྲ་དམངས་རྣམས་ཀྱིས་དྲ་ངོས་སྣེ་སྟེ(www.yongzin.com)བརྒྱུད་ནས་བཀོལ་སྤྱོད་དང་འཚོལ་བཤེར་བྱ་རོགས།

དེ་བས། རྒྱ་ཆེའི་དྲ་དམངས་རྣམས་ཀྱིས་ཚོད་གཏོང་དུས་ཡུན་ནང་། ཡོངས་འཛིན་འཚོལ་བཤེར་ལ་དོ་སྣང་ཆེས་ཆེར་གནང་བར་མཁྱེན། ངེད་ཀྱིས་ཡོངས་འཛིན་འཚོལ་བཤེར་གྱི་ཚོད་གཏོང་གནས་ཚུལ་དང་ཁྱེད་ཀྱི་བསམ་འཆར་ལྟར་ལེགས་བཅོས་དང་འཐུས་ཚང་དུ་གཏོང་ངེས།

འབྲེལ་གཏུག་བྱ་ཡུལ། 0974-8522228
གློག་རྡུལ་ཡིག་ཟམ། amdotibet@163.com

མཚོ་སྔོན་ཞིང་ཆེན་མཚོ་ལྷོ་ཁུལ་བོད་ཡིག་ཆ་འཕྲིན་ལག་རྩལ་ཞིབ་འཇུག་ལྟེ་གནས་ནས།
2016ལོའི་ཟླ8པའི་ཚེས2ཉིན།

“ཡོངས་འཛིན་བོད་ཡིག་འཚོལ་བཤེར་ཚོད་གཏོང་བྱས་པ།” དཔྱད་མཆན 3 ཡོད།

  1. འདི་ནི་བོད་ཀྱི་ལོ་རྒྱུས་སྟེང་གི་མཛད་རྗེས་ཆེན་པོ་ཞིག་རེད། སྐུ་ཞབས་ཚེ་ལོས་ལོ་མང་པོའི་རིང་ལ་སྟོབས་ཤུགས་ཡོད་དགུ་རྩལ་སྤྲུགས་སྒོས་འབབ་འབུངས་ལྷོད་མེད་གནངས་པའི་བྱས་རྗེས་ཡིན་པ་དང་། དེའི་ཕྱོགས་ལ་རྒྱབ་སྐྱོར་བྱས་པ་དང་མུ་མཐུད་དུ་བྱེད་བཞིན་པའི་སྲིད་གཞུང་དང་འགོ་ཁྲིད་དང་། ཁོང་གི་ལས་གྲོགས་རྣམས་ལ་ཡང་སྙིང་ཐག་པ་ནས་ཐུགས་རྗེ་ཆེ་ཞུ། འདི་ནི་མི་རིགས་མང་པོའི་རྒྱལ་ཁབ་ཅིག་གི་ནང་དུ་མི་རིགས་གྲངས་ཉུང་གི་རིག་གནས་ལ་སྲིད་གཞུང་གི་རྒྱབ་སྐྱོར་བླ་ན་མེད་པ་ཐོབ་བའི་དཔེ་མཚོན་ཆེན་པོ་དོན་དང་ལྡན་པ་རེད། སྙིང་སྟོབས་དེ་དང་ལས་ཕྱོགས་དེ་རིག་གནས་ཀྱི་ཁྱབ་ཁོངས་གཞན་པ་ལ་ཡང་ཡོངས་སུ་ཁྱབ་ཐུབ་པའི་རེ་བ་ཆེན་པོ་བཅངས་ཡོད། ཀློག་པ་པོ་ཞིག་ནས།

མཆན་སྤེལ་ཡུལ་ནི་ ཚེ་དབང་ཆོས་གྲགས། ལན་དོར།

ཡིག་ཟམ་ས་གནས་ཀུན་པོར་མི་བསྒྲགས། རྟགས * ཅན་ངེས་པར་དུ་བླུགས་དགོས།