ཕྲ་མཉེན་ཚང་གིས་གསར་དུ་ཁྱབ་བསྒྲགས་བྱས་པའི་ཐོན་རྫས་དང་གནས་ཚུལ་གལ་ཆེན་ཁག་བཅུ།

སྤྱི་ཟླ་༡༠ཚེས་ཚེ་༦ཉིན་གྱི་ཨ་རིའི་ཤར་ཕྱོགས་དུས་ཚོད་ཞོགས་པའི་ཆུ་ཚོད་༡༠:༠༠ཡི་ཐོག་ཏུ། ཨ་རིའི་ཕྲ་མཉེན་མཐུན་གཉེར་གྱིས་སྒེའུ་ཁུང་༡༠སྒུལ་བདེ་མ་(Windows 10 Mobile)དང་། དེ་འབྲེལ་གྱི་མཁྲེགས་ཆས་དང་གནས་ཚུལ་འགའ་རེ་ཁྱབ་བསྒྲགས་བྱས་སོང་།

ཐོག་མར་ཚང་མར་གསལ་འདེབས་ཞུ་རྒྱུ་ནི། སྒེའུ་ཁུང་༡༠(Windows 10)དང་སྒེའུ་ཁུང་༡༠སྒུལ་བདེ་མ་(Windows 10 Mobile)ནི་ཕྲ་མཉེན་ཚང་གི་སྒེའུ་ཁུང་མ་ལག་རིམ་བྱུང་ནང་གི་ཆེས་གལ་ཆེ་ཤོས་དང་། ཁ་ཕྱོགས་ཀྱི་དཀྱོག་མཚམས་ཤིག་ཡིན་ཏེ། མ་ལག་གསར་པ་འདི།

1. སྒེའུ་ཁུང་༨ལྟར་སྲོལ་རྒྱུན་སྟེགས་འཇོག་རྩིལ་འཕྲུལ་དང་། གསར་དུ་བྱུང་བའི་རེག་ཤེས་ལྡན་པའི་པང་ལེབ་རྩིས་འཕྲུལ་དང་པང་འཛིན་རྩིས་འཕྲུལ་གཉིས་ཀར་སྤྱི་མཐུན་དུ་སྤྱོད་ནུས།

2. སྒེའུ་ཁུང་འདི་ནས་བཟུང་སྟེ། མ་འོངས་པར་ཉེར་སྤྱོད་མཉེན་ཆས་ཚང་མ་སྲོལ་རྒྱུན་སྟེགས་འཇོག་རྩིས་འཕྲུལ་དང་། རེག་ཤེས་ལྡན་པའི་པང་ལེབ་རྩིས་འཕྲུལ་དང་པང་འཛིན་རྩིས་འཕྲུལ། དེ་བཞིན་ལག་འཛིན་ཁ་པར་བཅས་ཀྱི་ཐོག་ཏུ་ཡོངས་ཁྱབ་ཏུ་སྤྱོད་ཐུབ་པ་བྱེད་རྒྱུ་རེད།

3. སྔར་ཡོད་ཧི་གཟུགས་ཡིག་གཟུགས་དང་བོད་ཡིག་གཏག་ཐབས་ཡོད་པའི་སྟེང་དུ། རྫོང་ཁ་སྟེ། འབྲུག་པའི་གཏག་ཐབས་དང་ས་གནས་ངོས་འཛིན་ཁ་སྣོན་བྱས་ཡོད། འབྲུག་པའི་གཏག་ཐབས་ནི་དབྱངས་གསལ་སོ་བཞིའི་གོ་རིམ་ལྟར་བསྒྲིགས་པའི་གཏག་ཐབས་ཤིག་ཡིན།

སྒེའུ་ཁུང་༡༠སྒུལ་བདེ་མ་(Windows 10 Mobile)ཟེར་བ་འདི་ནི་རིག་ལྡན་ལག་འཛིན་ཁ་པར་གྱི་མ་ལག་གསར་པ་ཞིག་ཡིན་ལ། སྔར་ཡོད་ཀྱི་སྒེའུ་ཁུང་ཁ་པར་༨་༠དང་༨་༡(Windows Phone 8.0/8.1)ཐོག་གི་ཁྱད་ཆོས་ཕལ་ཆེ་བ་རང་སོར་བཞག་པའི་སྟེང་དུ། ཁྱད་ཆོས་དང་ནུས་པ་གསར་པ་མང་བོ་བསྣན་ཡོད་མོད། གཅིག་གཉིས་ཤིག་ངོ་སྤྲད་ན།

1. མིག་བཤེར་གྱིས་ཁ་པར་གྱི་ཟྭ་འབྱེད་པ།
2. འཆར་ངོས་ཤིག་ལ་མཐུད་ཚེ་ཁྱེད་ཀྱི་ཁ་པར་དེ་རྩིས་འཕྲུལ་ཞིག་ཏུ་འགྱུར་བ།
3. སྔར་ཡོད་ཀྱི་བོད་ཡིག་གི་ཡིག་གཟུགས་ཡོད་པའི་སྟེང་དུ། བོད་ཡིག་གཏག་ཐབས་གཉིས་བསྣན་ཡོད་དེ། གཅིག་ནི་བོད་སྐད་ཡིན་ལ། དེ་ནི་ད་སྔ་ཕྲ་མཉེན་གྱི་སྒེའུ་ཁུང་མ་ལག་ཏུ་ཡོད་བསྡད་པའི་བོད་ཡིག་གཏག་ཐབས་དེ། རེག་ཤེས་ཤེལ་ངོས་དང་འཚམས་པར་འགྱུང་བ་ཉུང་ཙམ་རེ་བཏང་བ་ཞིག་རེད། གཞན་པ་དེ་ནི་རྫོང་ཁ་སྟེ། འབྲུག་པའི་གཏག་ཐབས་ཡིན་ལ། འདི་ནི་དབྱངས་གསལ་སོ་བཞིའི་གོ་རིམ་ལྟར་བསྒྲིགས་པའི་གཏག་ཐབས་ཤིག་ཡིན།

ད་ནི་ཁྱེད་ལ་ཕྲ་མཉེན་ཚང་གིས་མདང་དགོང་ཁྱབ་བསྒྲགས་བྱས་པའི་ཐོན་རྫས་དང་གནས་ཚུལ་གལ་ཆེན་ཁག་བཅུ་ངོ་སྤྲོད་བྱས་ན།

1. ལུ་མི་ཡ་༩༥༠(Lumia 950)སྟེ། སྒེའུ་ཁུང་༡༠སྒུལ་བདེ་མའི་རུ་འདྲེན་གྲུ་གཟིངས།

2. ལུ་མི་ཡ་༩༥༠ཆེན་པོ་(Lumia 950 XL)སྟེ། ཕྲ་མཉེན་ཚང་གི་ཁ་པར་གཟུགས་སྟོབས་ཅན།

3. ལུ་མི་ཡ་༥༥༠(Lumia 550)སྟེ། ཕྲ་མཉེན་ཚང་གི་ཁ་པར་གོང་བདེ་མ།

4. འཆར་ངོས་འདོགས་སྟེགས་(Display Dock)ཏེ། ཁ་པར་དེ་རྩིས་འཕྲུལ་ལ་བསྒྱུར་བའི་ཐབས་ལམ་གསར་པ།

5. སུར་ཧྥེ་སི་ཆེད་ལས་༤(Surface Pro 4)སྟེ། པང་ལེབ་རྩིས་འཕྲུལ་གྱི་དམག་འཐབ་ཁྲོད་ཀྱི་དཔའ་རྟུལ་གསར་པ།

6. སུར་ཧྥེ་སི་དེབ་(Surface Book)སྟེ། དངོས་སུ་ཕྲ་མཉེན་ཚང་གིས་བཏོན་པའི་པང་འཛིན་རྩིས་འཕྲུལ།

7. ངོ་དེབ་(Facebook)སྟེ། ད་ལྟ་སྒེའུ་ཁུང་༡༠བའི་ཁྱབ་ཁོངས་ཀྱི་ཡོངས་ཁྱབ་ཉེར་སྤྱོད།

8. སུར་ཧྥེ་སིའི་ཉེར་སྤྱོད་མཁྲེགས་ཆས་(Surface Accessories)གསར་པ་སྐོར་ཞིག་སྟེ། རིམ་སྤར་བྱས་པའི་སུར་ཧྥེ་སི་འདོགས་སྟེགས་དང་། གཏག་ཆས་རྒྱབ་ཁེབས་གསར་པ་སོགས་སོ།།

9. ཕྲ་མཉེན་ཚང་གི་ལག་གདུབ་གསར་པ་(New Microsoft Band)སྟེ། རིག་ལྡན་ཆུ་ཚོད་ལ་སྤྲད་པའི་བརྡ་ལན་གསར་པ་ཞིག

10. ཡོངས་སྣང་པར་མིག་གསར་སྤེལ་འཕྲུལ་སྒམ་(HOLOLENS Development Kits)གྱི་རིན་གོང་ཨ་སྒོར་༣༠༠༠རེད།

– ཐེ་བྲག་བསྟན་པས་ཕྱོགས་བསྡུས་བྱས།

གསལ་བཤད། གནས་ཚུལ་དང་པར་རིས་ཀྱི་འབྱུང་ཁུངས་ཁག་ནི། ཕྲ་མཉེན་ཚང་གི་གཞུང་ཕྱོགས་དྲ་བ་ www.microsoft.com ། ཚན་རིག་ལག་རྩལ་དྲ་བ་ www.theverge.com དང་།  www.windowscentral.com བཅས་ཡིན།